TNT, SMBeer basagan sa 2-1 lead

MANILA, Philippines - Aminado si TNT Katropa head coach Nash Racela na nawala sila sa focus sa second period matapos ang 17-0 panimula laban sa San Miguel sa Game Two ng 2017 PBA Commissioner’s Cup noong Biyernes.

At ang resulta nito ay ang 102-88 pagresbak ng San Miguel.

“I think we lost focus and composure, especially in the second quarter,” wika ni Racela. “This is the PBA, the team that loses composure is the team that loses. We have to learn how to take the punches.”

Sa pagkakatabla ng kanilang best-of-seven championship series ay kapwa pipilitin ng Tropang Texters at Beermen na makuha ang 2-1 bentahe ngayong alas-6:30 ng gabi sa Game Three sa Smart Araneta Coliseum.

Sa kanilang kabiguan sa Game Two ay tumapos si Jayson Castro na may 14 points para pangunahan ang TNT Katropa, habang nagtala si import Joshua Smith ng 11 markers.

Hindi naman nakaiskor si rookie guard Roger Pogoy matapos magtala ng career-high na 27 points sa 104-102 pagtakas ng Tropang Texters kontra sa Beermen sa Game One noong Miyerkules.

“More than the defense of San Miguel, I know they have a scheme against Jo­shua, but more than the scheme of San Miguel, it was... well the problem really was how we reacted to all the other things,” ani Racela.

Inaasahan ni San Mi­guel mentor Leo Austria na gagawa ng adjustment ang TNT Katropa.

Samantala, nagbayad nang malaki si Pogoy dahil sa kanyang pagtapik sa bayag ni Arwind Santos ng San Miguel sa Game Two.

Pinagmulta ng PBA si Pogoy ng P30,000 dahil sa kanyang “an unprovoked, unsportsmanlike act with the intent to hurt by deliberately hitting the groin of Arwind Santos”.

Ang nasabing insidente ay nangyari sa kaagahan ng third quarter matapos lumambitin sa ring si Santos mula sa mintis na fastbreak layup ni Alex Cabagnot.

Sa paglambitin ni Santos sa ring ay tinapik ni Pogoy ang maselang bahagi ng one-time MVP.