Cavs underdog kontra Warriors

INDEPENDENCE, Ohio - Marami ang hindi binibigyan ang Cleveland Cavaliers ng tsansang manalo sa NBA Finals.

Bagama’t sila ang defending champions at nagbabandera kay LeBron James ay papasok sila sa championship series bilang isang ‘underdog’ laban sa Golden State Warriors.

“The whole underdog thing is funny to me, because yeah, at the end of the day we are defending our title,” sabi ni Cavaliers forward Kevin Love matapos ang kanilang ensayo noong Sabado. “We’re trying to repeat, which is so hard to do. I think we will use it as fuel. We will use it as motivation, but the idea of playing into it? It’s tough for me to say that is the case. I don’t feel like we’re underdogs.

“We match up well with them and I think they’d say the same about us,” dagdag pa nito.

Sisimulan ng Cavaliers at Warriors ang kanilang ikatlong sunod na Finals rematch sa Game One sa Huwebes sa Cleveland.

Ikinainis ng Cleveland ang pasaring ni Golden State forward Draymond Green noong nakaraang Oktubre.

Matapos isuko ng Warriors ang 3-1 bentahe sa nakaraang NBA Finals laban sa Cavaliers ay sinabi ni Green, sinuspinde sa Game Five ng nasabing serye, na kung bibigyan siya muli ng pagkakataon ay wawasakin at hihiyain niya ang tropa ni James.

“He’s a guy who said he wanted us,” wika ni Love kay Green. “And he has us - starting next Thursday.”

Para palakasin ang kanilang tsansa sa NBA championship ay idinagdag ng Warriors si superstar Kevin Durant.

Ang Golden State, sa pangunguna nina Durant, Green, Stephen Curry at Klay Thompson, ay nagtala ng 12-0 record sa postseason at tumipa ng winning average na 16.3 points per game- ang highest margin sa league history.

Kaya naman sila ang naging ‘heavy favorites’ para talunin ang Cavaliers sa ikalawang pagkakataon sa nakaraang tatlong taon.

Tinawag ni James ang Warriors bilang “that juggernaut” at “a beast” matapos nilang sibakin ang Boston Celtics sa Game Five at lampasan si Michael Jordan bilang bagong career postseason scoring leader.