Pinay volleybelles yumuko sa Japan
MANILA, Philippines - Lumasap ng pambuenamanong kabiguan ang Philippine Superliga-Manila matapos itarak ng powerhouse Hisamitsu Springs-Japan ang 25-17, 25-10, 25-14 panalo sa pagsisimula ng Asian Women’s Club Championships kahapon sa Boris Alexandrov Sports Palace sa Ust-Kamenogorsk, Kazakhstan.
Inilatag ni Jaja Santiago ang kanyang buong lakas nang iposte nito ang 16 puntos para pamunuan ang PSL-Manila squad.
Kumana naman si Kim Fajardo ng apat na puntos at 11 excellent sets samantalang may tig-tatlong puntos sina Ces Molina, Rhea Dimaculangan at Jovelyn Gonzaga at tig-dalawa naman sina Mika Reyes at Rachel Anne Daquis.
Sa kabila ng pagkatalo, masaya si national team head coach Francis Vicente sa ipinakita ng kanyang bataan kung saan napuwersa nitong makagawa ng 18 errors ang Hisamitsu Springs na kampeon noong 2002 at 2014.
Bumandera para sa Japanese team si middle blocker Fumika Moriya na naglista ng 14 puntos samantalang umani si Yuka Taura ng 12 markers at 11 naman buhat kay Yuka Imamura.
Sunod na makakaharap ng PSL-Manila ang Southeast Asian Games silver medalist Vietnam alas-11:30 ng umaga (1:30 ng hapon sa Maynila) ngayong araw.
- Latest
