Too Young

Dear Dr. Love,

Kamusta po sa lahat ng  staff of PSN at higit sa lahat, sa inyo, Dr. Love.

Isa lamang po ako sa libu-libong sumusubaybay  ng Dr. Love. Di ko akalain na susulat din ako sa iyo tulad ng iba to seek advice.

Ako po si Jeany, 16 years-old. Ang hihingin ko pong payo ay tungkol sa aking boyfriend na tawagin na lang natin sa pangalang Lorn.

Nagpaalam siya sa akin na magtatrabaho dahil kailangan niya ang pera. Nagkahiwalay kami dahil doon.

Nandito po ako sa Bulacan ngayon. Sa Davao  po ang probinsya ko. Naisipan kong umalis sa amin para magtrabaho sa pag-asang matanggal ang lungkot ko. Pero nagkamali ako dahil naiisip ko pa rin ang boyfriend ko.

Ang problema pa ay lagi akong sumusulat sa kanya, pero ni-minsan ay hindi pa niya ako sinusulatan. Hanggang nagsawa na ako. Iniisip ko po na baka may iba na siya kaya nakalimutan na niya ako. Sa tingin po ba ninyo ay magkikita pa kami at magkakatuluyan?

Maraming salamat po at umaasa ako sa mahalagang payo ninyo sa akin.

Jeany

Dear Jeany,

Hello rin sa iyo at sana ay makapagbigay ako ng makabuluhang advice para sa iyo. Sweet sixteen ka pa lang. Napakabata mo pa para sa pag-ibig.

Hindi namin tinatawaran ang damdamin mo pero dahil sa sitwasyong naghihiwalay sa inyong dalawa ni Lorn, makabubuting huwag ka na munang mainip sa pagbabalik niya dahil ang sabi mo nga, kailangan niyang magtrabaho dahil mayroong problemang pinansiyal ang kanyang pamilya.

As I said, you are too young for love. Batambata ka pa at kung hindi man kayo ang magkatuluyan ng boyfriend mo, marami ka pang makikilalang iba. Kung talagang kayo ni Lorn ang magkapalad sa isa’t isa, gagawa ng daan ang tadhana para magkita kayong muli o gagawa siya ng daan para magkaroon uli kayo ng komunikasyon.

Mahirap pagsamahin ang pag-ibig at pagha­hanapbuhay bilang paghahanda sa kinabukasan.

Maaaring praktikal lang ang boyfriend mo at nahihirapan din siya sa trabaho kaya hindi niya nasasagot ang liham mo o maaaring tama rin ang hinala mo na may iba na siyang nililigawan.

Cheer up. Mag-enjoy ka muna sa pagiging dalaga at sikapin mong mapaghandaan ang kinabukasan mo.

Dr. Love