Yao Ming presidente na sa CBA
CEBU, Philippines - Ang Chinese Basketball Association miboto ni Yao Ming isip presidente sa ilang kahugpongan.
Segun sa social media account sa CBA, gihangop ni Yao Ming ang maong posisyon uban ang panghinaut nga makahatag siya og kaayohan ug dunay mahimo alang sa kalamboan sa ilang asosasyon.
Laraw sab ni Yao Ming ang paghagpat og mga talento aron ilang hashason og maayo sa ingon modaghan ang mga Tsinoy players nga mopakita’g aksiyon sa internasyonal nga mga liga.
Ang pagtudlo ni Yao gikonsidera nga kabahin sa buot nga i-implementar nga reporma sa CBA nga sa kanunay pangulohan sa mga opisyales sa ilang gobiyerno.
Ang 36-anyos nga si Yao usa sa labing unang mga atleta gikan sa China nga misikat sa tibuok kalibotan human siya gibunlot sa Houston Rockets isip No. 1 overall pick niadtong 2002 NBA Draft. Ang 7-foot-6 nga sentro nakaduwa og walo ka season sa NBA sa wala pa moretiro niadtong 2011 gumikan sa balik-balik nga mga injury ilabi na sa iyang tuhod. Gibayaw siya sa Hall of Fame niadto lang miaging tuig. (BANAT NEWS)
- Latest