Dela Cruz bumandera sa mga MOS awardees

MANILA, Philippines - Pinangunahan ni Universiade qualifier Alic Deniel Dela Cruz ng Capiz Turbo Sharks ang mga Most Outstanding Swimmer awardees sa 105th Philippine Swimming League (PSL) National Series na ginanap sa Villareal Sports Complex sa Roxas City, Capiz.

Nakalikom ang 17-an­yos na si Dela Cruz ng 47 puntos para pagreynahan ang girls’ 15-over division.

Nasiguro rin nina record-breaker Michael Lozada, Marie Joe Borres, Jennuel Booh De Leon at Sidley Rose Malumay ang MOS award sa kani-kanilang dibisyon.

Winalis ni Lozada ang lahat ng kanyang limang events upang makakuha ng 50 puntos sa boys’ 10-year habang namayagpag din sina Borres na may 42 puntos (girls’ 11-year), De Leon na may 44 puntos (boys’ 11-year) at  Malumay na may 34 puntos (girls’ 13-year).

Ang iba pang MOS winners ay sina Stacey Arabella (girls’ 6-under), Roselle Angela Palma (girls’ 7-year), Kate Zaira Roberto (girls’ 8-year), Jamie Refugio (girls’ 9-year), Althea Joyce Llera (girls’ 10-year), Natazha Lozada (girls’ 12-year) at Atilla Pia Loy (girls’ 14-year) gayundin sina Jozsef Bem Calib­jo (boys’ 6-under), Lance Magno (boys’ 7-year), Gian Paolo Gomez (boys’ 8-year), Gregory Miles Sumile (boys’ 9-year), Khraven Brian Villareal (boys’ 12-year), Lance Jiro Tacsagon (boys’ 13-year), Michael Marino (boys’ 14-year) at Lance Joshua Roldan (boys’ 15-over).

Itinanghal na overall champion ang Aklan Swimming Team na nakalikom ng 806 puntos habang pumangalawa ang host Capiz Turbo Sharks na may 602 puntos at ikatlo naman ang Metro Iloilo Poseidon Swim Club na may 465 puntos.

Nasa ikalima ang Panaad Swim Club (361), ika­anim ang Poseidon Swim Club (341) at ikapito ang Assa Villa Mejia Swim Team (79).

Isang rekord lamang ang naitala sa edisyong ito mula kay Michael Lozada na binasag ang lumang marka sa 50m backstroke sa bisa ng 36.28 segundong naitala nito.