2016 Batang Pinoy National finals Cavite chessers may pahabol pang 5 ginto
TAGUM, Davao del Norte, Philippines-- Matapos sa track and field ay bumandera naman ang mga pambato ng Dasmariñas City, Cavite sa chess tournament nang magsulong ng limang gintong medalya sa 2016 Batang Pinoy National Championship kahapon sa Davao del Norte Sports And Toursim Complex sa Tagum City dito.
Sumikwat sina Daniel Quizon at Kaylen Joy Mordido ng tig-dalawang gold medal, habang nagdagdag naman ng isa si Jerly Mae San Diego.
Bumandera sina Quizon at Mordido sa boys’ 12-under standard at blitz at girls’ 13-17 years old standard at blitz event, ayon sa pagkakasunod at nanguna naman si San Diego sa girls’ 12-under blitz.
Kamakalawa ay nagtakbo ng apat na ginto si Veruel Verdadero sa boys’ 13-15 yrs old 100m (11.40), 200m (23.29), 400m (52.00) at sa 4x100m relay (47.20).
Walong ginto naman ang isinayaw ng Cebu City sa dancesports competition mula sa mga panalo nina Lloyd Simon Asuque at Raylyn Jhea Romeo (Standard Junior C at Latin Junior C), Jim Jocson at Mitchlomi Dinauanano (Standard Juvinile A), Jaydel Fresh Pat at Angel Therese Epe (Latin Juvenile A), Gyle Nino Diluvio at Julia Paz Branzuela (Standard Junior A), Jake Emmanuel Corro at Anndreah Capangpangan (Latin Junior A) at Andrew Ysla at Noelyn Mie Pedrano (Standard at Latin Youth A).
Samantala, tiyak namang may susunod sa mga yapak ni Hidilyn Diaz.
Magaang na binuhat ni Zamboanga weightlifter Rose Jean Ramos ang isang 44-kilogram barbell para angkinin ang ginto sa 32-kg category.
Ang 11-anyos na si Ramos ay pinsan ng 26-anyos na si Diaz, bumuhat ng silver medal sa nakaraang 2016 Olympic Games noong Agosto sa Rio de Janiero, Brazil.
Limang gold naman ang inangkin ng Cebu City sa karatedo kata (form).
Ang iba pang nanalo ng ginto ay sina Milagrace Balan (girls’ 16-17), Vanessa Rojas (girls’ 14-15) at Jeremiah Sarabia (boys’ 16-17) ng Zamboanga City at sina Rodel Maagad (boys’ novice 16-17) at Christian Contiga (boys’ novice 14-15) ng Misamis Oriental.
- Latest
