SBP-Passarelle twin tournament NCR Finals kasado na

MANILA, Philippines - Maglalaban-laban ang walong koponan para sa NCR regional finals ng taunang SBP (Small Basketeers of the Philippines) - Passarelle twin tournament.

Inorganisa ng multi-awarded school para sa basketball at volleyball na BEST (Basketball Efficiency and Scientific Training) Center at itinataguyod ng Milo katuwang ang Chris Sports at Rain or Shine, didribol ang nasabing event bukas sa Jacinto Tiu Competition Court sa Xavier School, Greenhills, San Juan.

Mag-aagawan para sa SBP NCR Championship  ang Ateneo Grade School at La Salle Greenhills, habang maglalaban naman ang Adamson University at La Salle Greenhills A para sa Passarelle division.

Ang iba pang regional playoffs ay nakatakda sa October 21-24 sa Davao City para sa Mindanao, sa November 4-7 sa Baguio City para sa Luzon at sa November 18-21 sa Roxas City para sa Visayas.

Magsasagupa ang mga mananalo sa bawat regional championship game para sa national finals na gagawin sa Bacolod City sa December 3-4.

Nasa kanilang ika-31 season, ang SBP-Passarelle ang pinakaprestihiyosong interschool basketball competition para sa mga bata.