Akhuetie lalaro na sa Altas, kontra Lions sa Game 1 ng Final 4
MANILA, Philippines – Naayos din ng Nigerian import na si Bright Akhuetie ang kanyang problema sa University of Perpetual Help Altas.
Dahil dito pinayagan si Akhuetie na maglaro sa laban ng Altas kontra top seed San Beda Red Lions bukas sa simula ng Final Four ng 92nd National Collegiate Athletic Association (NCAA) basketball tournament na gaganapin sa Mall of Asia Arena sa Pasay City.
Sinuspinde si Akhuetie ng isang laro dahil sa disciplinary action kaya natalo sila sa Mapua Cardinals, 63-67, noong Biyernes.
Bunga ng nasabing kabiguan bumagsak ang Altas sa ika-apat na puwesto taglay ang 11-7 record.
“Yes, we did patched out our differences, everything is okay now and yes, he will be playing,” sabi ni Nosa Omorogbe, dati ring Nigerian player ng Altas na ngayon ay kasama na sa coaching staff.
Umamin si Omorogbe na malaking bagay ang pagbabalik ni Akhuetie sa Altas dahil sa kanyang season average na 18 .4 points (third best in the league), 12.3 rebounds (fourth) and 1.7 blocks (fifth).
Mayroong twice-to-beat advantage ang Red Lions bilang top seed ngunit sa tulong din ni 6-11 Prince Eze, isa pang Nigerian malaki ang tsansa ng Altas na makalusot sa hinahangad na unang kampeonato sa NCAA.
Ang Hindi paglalaro ng Cameronian na si Donald Tankoua para sa San Beda dahil sa injury ang nagpatibay sa loob ng Altas.
“Hopefully we could cash in on it,” ani pa ni Omorogbe.
Hindi pa nanalo ang Altas sa Red Lions sa kanilang dalawang beses na paghaharap.
Unang inilista ng Mendiola-based cagers ang 70-88, panalo sa first round ng elimination bago sinundan ng 75-84 pananaig sa ikalawang ikutan.
- Latest