Aguilar, Guevarra nagdomina sa PPS Naga netfest
MANILA, Philippines – Lalo pang pinasigla nina Glydel Guevarra at John Benedict Aguilar ang kanilang tennis careers matapos kumuha ng tig-dalawang korona, habang nagdomina sina top seeds Kurt Angelo Molina at Nica Alanis sa kanilang mga dibisyon sa Palawan Pawnshop-Palawan Express Pera Padala Naga City regional age-group tennis tournament sa Naga City Tennis Club noong Linggo.
Dalawang beses dinaig ng 10-anyos na si Guevarra si Aika Idioma nang kunin ang 6-0, 6-0 panalo sa girls’ 12-and-under finals at ang 6-2, 6-1 tagumpay sa 14-U sa Bicol leg ng Group 5 tournament na itinataguyod ng Palawan Pawnshop at inihahandog ng Slazenger.
Nabigo naman ang Iriga City star, nanalo sa 10-unisex class ng nakaraang Olivarez Cup, sa kanyang hangad na three-title feat nang yumukod kay Aguilar sa 10-U semis.
Tinalo ni Aguilar si Ryan Taller, 4-2, 2-4, 5-3, sa finals.
Inangkin din ng tubong Camalig, Albay na si Aguilar ang boys’ 12-U plum mula sa kanyang 6-3, 7-6 (5) paglusot kay Harry Bonavente sa event na pinamahalaan ni Naga City Mayor John Bongat katuwang ang Asiatraders Corp., ang exclusive distributor ng Slazenger, bilang official ball.
- Latest