Lady Maroons asinta ang semis
MANILA, Philippines – Pakay ng University of the Philippines na masungkit ang tiket sa Final Four sa pagpapatuloy ngayong hapon ng Shakey’s V-League Season 13 Collegiate Conference sa Philsports Arena sa Pasig City.
Subalit daraan sa matinding pagsubok ang Lady Maroons dahil makakaharap nito ang nagdedepensang National University sa alas-4.
Mataas ang kumpiyansa ng UP na galing sa panalo kontra Ateneo Lady Eagles, 25-18, 14-25, 25-20, 25-18, na siyang nagpaangat sa kanila sa 2-1 baraha sa ikatlong puwesto.
Nangunguna ang Lady Bulldogs at Far Eastern University Lady Tamaraws na may parehong 3-1 kartada at kapwa nakatitiyak na ng silya sa Final Four.
Sunud-sunod na laban ang pagdaraanan ng UP kaya naman nais na lamang ni coach Jerry Yee na maging handa ang kanyang bataan sa aspetong mental at pisikal. Matapos ang NU, sunod na makakaharap ng Lady Maroons ang San Sebastian.
Aasahan ng UP si UAAP Rookie of the Year Isa Molde kasama sina V-League Open Conference Best Blocker Katherine Bersola, Marian Buitre, Diana Carlos, Justine Dorog at Nicole Tiamzon.
Ang Lady Bulldogs naman ay mamanduhan ni 6-foot-5 Jaja Santiago kasama sina Aiko Urdas, Risa Sato, Jorelle Singh, Roma Doromal at Audrey Paran na gagabayan ni league leading setter Jasmine Nabor.
Maghaharap naman sa ikalawang laro ang Ateneo (1-2) at University of Santo Tomas (0-4) sa alas-6 ng gabi kung saan kinakailangan ng Lady Eagles na mawalis ang kanilang huling dalawang asignatura.
Sa Spikers’ Turf, nais ng Ateneo na mawalis ang Group B kung saan makakasagupa nito ang UP sa kanilang huling asignatura sa alas-12.
Maglalaro naman ang Philippine Merchant Marine School at St. Benilde sa non-bearing game sa alas-10 ng umaga.
- Latest
