Arcilla, Tierro umabante sa quarterfinals ng PCA Open
MANILA, Philippines - Pinangunahan nina Davis Cup veterans Johnny Arcilla at Patrick John Tierro ang mga quarterfinalists sa 35th Philippine Columbian Association (PCA) Open-Cebuana Lhuillier men’s tennis tournament na ginaganap sa PCA indoor shell-clay court sa Paco, Manila.
Sapat na lakas ang inilabas ng top seed na si Arcilla upang mabilis na dispatsahin si Betto Orendain, 6-0, 6-3, habang namayani ang second pick na si Tierro kay Arthur Craig Pantino, 6-2, 6-2.
Makakasagupa ni Arcilla sa susunod na yugto si Argil Lance Canizares na nagtala ng 3-6, 6-3, 6-0 panalo laban kay Joseph Arcilla samantalang haharap si Tierro laban kay Rolando Ruel Jr. na umiskor naman ng 6-2, 7-6 (6) panalo kay Dheo Talatayod.
Naisaayos naman nina Elbert Anasta at Ronard Joven, at Marc Reyes at Fritz Verdad ang kanilang pagtutuos sa quarterfinals matapos patumbahin ang kani-kanilang karibal.
Tinalo ni Anasta si Noel Damian, 7-5, 1-6, 6-1; ginapi ni Joven si Kyle Parpan, 6-1, 6-2; pinayuko ni Verdad si Jet Justin Asilo, 6-1, 6-2; at umusad via walk-over si Reyes laban kay Leander Lazaro.
Sa men’s doubles, pasok din sa quarterfinals sina Arcilla at Joven na nanalo kina Ruben Santiago at Arn Procianos, 6-2, 6-2, gayundin sina Tierro at Jed Olivarez Jr. kontra kina Randy Villanueva at Derrick Santos, 6-2, 6-2.
- Latest
