Pinoy bets nagsimula na sa pagpapapawis
RIO DE JANEIRO - Siyam na araw bago ang opening ceremony ay nagsimula nang maghanda ang pitong Filipino athletes na maglalaro sa limang sports events sa 2016 Rio Olympics.
Noong Lunes ay pinagpahinga ang mga atleta kung saan sila namasyal sa paligid ng Rio de Janeiro sakay ng mga inupahang vans.
Gustong maging pamilyar sa playing venue at lamesang gagamitin, nagsanay si table tennis bet Ian Lariba sa umaga at nanatili pa ng dalawang oras para obserbahan ang bilis ng bola sa venue.
Ito ang unang Olympics ng 21-anyos na si Lariba na tatayong flag bearer ng Pilipinas sa Aug. 5 opening ceremony ng Rio Olympics.
May kakaibang nararamdaman ang tubong Cagayan de Oro at pambato ng De La Salle University.
“I’m nervous and excited at the same time. There’s pressure,” wika ni Lariba sa kanyang pagtambay sa dining hall ng Athletes Village kasama si South Korean coach Mi Sook Kwon.
Sina swimmers Jessie Khing Lacuna at Jasmine Alkhaldi ay dalawang beses sa isang araw kung magsanay kasama sina coaches Archie Lim at American Jennifer Buffin.
Dumating naman si Alkhaldi sa Rio kamakalawa mula sa Hawaii via Dallas at Miami na bumiyahe ng kabuuang 31 oras.
Lalahok siya sa women’s 100-m freestyle at sasali naman si Lacuna sa men’s 400-m freestyle.
Kumpara kay Lariba, alam na nina Lacuna at Alkhaldi ang pakiramdam ng paglalaro sa Olympics matapos kumampanya noong 2012 London Games.
Samantala, nagsimula na ring mag-ensayo sina weightlifters Nestor Colonia at Hidilyn Diaz.
Ito ang pangatlong Olympics ni Diaz, ang 2012 London Olympics flag bearer, katulad ni Torres.
Dalawang beses sa isang araw nagsanay si taekwondo entry Kirstie Elaine Alora kung saan siya sumasailalim sa plyometrics sa umaga at sparring sa kanyang coach na si dating Southeast Asian Games finweight Kitoy Cruz sa hapon.
Si long jumper Marestella Torres-Sunang ay ginagabayan ni coach Joebert Delicano.
Nakatakda namang dumating sina boxers Rogen Ladon at Charly Suarez sa Rio sa Miyerkules ng gabi mula sa Las Vegas kasama si coach Boy Velasco.
Tatlo pang Pinoy athletes ang makakasama ng delegasyon sa mga susunod na araw.
Sina track and field bets Eric Cray at Mary Joy Tabal ay magmumula sa Hawaii at Japan, ayon sa pagkakasunod, habang si golfer Miguel Tabuena ay manggagaling sa Manila.
- Latest
