Pinoy athletes pinag-relax muna para makondisyon sa laban

RIO DE JANEIRO - Sa kanilang paggising ay ramdam pa ng Philippine delegation ang pananakit ng kanilang katawan mula sa nakakapagod na 25-hour flight mula sa Manila.

Kaya naman binigyan sila ng sapat na pahinga para mabawi ang kanilang lakas bago sumabak sa 2016 Rio Olympics.

Maliban sa Philippine flag bearer na si Ian La­riba ng table tennis, hindi muna nag-ensayo sina long jump specialist Ma­restella Torres-Sunang, swimmer Jessie Khing Lacuna, taekwondo jin Kirstie Elaine Alora at weightlifters Hidilyn Diaz at Nestor Colonia matapos dumating dito kamakalawa.

Dinala ng mga sports officials, sa pangunguna ni Joey Romasanta, ang mga athletes at coaches sa mga tourist destinations, kasama rito ang sikat na Christ the Redeemer statue na isang oras ang layo mula sa Athletes Village.

“We just made the most out of the one-day break. And since everybody wanted to see the Christ the Redeemer sta­tue, we took the chance. Everybody was happy with the visit. And it was nice to see our athletes loosen up,” sabi ni Romasanta.

Maikling ensayo lamang ang ginawa ni Lariba sa ilalim ni South Korean coach Mi Sook Kwon, ang silver medalist noong 1999 World Championships.

“We did just enough,” sabi ng 21-anyos na si Lariba, ang unang atleta ng Pilipinas na sasabak sa aksyon sa Summer Games na binabalot ng pag-aalala tungkol sa Zika virus, security threats at napipintong ban sa mga Russian athletes.

Maglalaro si Lariba isang araw matapos ang opening ceremony kasunod si Lacuna at boxers Rogen Ladon at Charly Suarez na gagawin ang kanilang mga Olympic debut sa ibang venues.

Ipinagpahinga naman ni track coach Joebert Delicano si Torres-Sunang na nauna nang nagsanay isang araw bago sila magtungo sa Rio.

“Her muscles were tight due to the long flight. She had to stay out of the track at least for today. With a­nother good sleep, her body should feel better tomorrow,” ani Delicano, isang long jump champion sa kanyang kapanahunan.

Magtutungo naman sina Colonia at Diaz sa training venue sa Martes at sasama sa opening march kasunod ang laban nila sa Aug. 7.

Sina Ladon at Suarez ay manggagaling sa Las Vegas kung saan sila nagsanay ng halos isang buwan para sa Rio Olympics, habang nakatakdang dumating si golfer Miguel Tabuena sa Rio isang araw matapos ang opening ce­remony para sa golf competition sa Aug. 11-14.

Magmumula naman si runner Eric Cray buhat sa Houston, habang si marathoner  Mary Joy Tabal ay magmumula sa Japan bago ang opening.

Samantala, dumating noong Lunes si swimmer Jasmine Alkhaldi sa Athletes Village kasama ang kanyang coach na si Jennifer Buffin galing sa Hawaii.