Shakey’s V-League mapapanood na sa ABS-CBN Sports and Action Channel 23

MANILA, Philippines – Nakahanap ng bagong tahanan ang Shakey’s V-League dahil simula sa Mayo 28, mapapanood na ang liga sa ABS-CBN Sports and Action Channel 23 na siyang magiging television partner nito.

Ito ang kinumpirma ni Sports Vision president Ricky Palou matapos makipagkasundo ang mga organizers sa ABS-CBN Sports and Action.

“Yes, it’s official, the Shakey’s V-League has partnered with ABS-CBN,” wika ni Palou.

Magsisimula ang 13th Shakey’s V-League Open Conference sa Sabado sa The Arena sa San Juan City tampok ang paghaharap ng Pocari Sweat at University of the Philippines sa alas-4 ng hapon kasunod ang duwelo ng National University at Laoag City sa alas-6 ng gabi.

Dati nang napapanood ang V-League sa NewsTV Channel 11 ng GMA Network subalit dismayado ang ilang mga fans dahil hindi ito ipinapalabas ng live. Tanging ang mga krusyal na mga laro lamang ang ini-ere ng live gaya ng championship matches.

Mamanduhan nina Michele Gumabao at Melissa Gohing ng La Salle, Myla Pablo ng NU at sina Rosemarie Vargas at Gyzelle Sy ng FEU ang ratsada ng Pocari Sweat na isa sa itinuturing na paborito sa kumperensiyang ito.

Subalit hindi basta-basta ang kanilang makakaharap dahil ipaparada ng Lady Maroons ang matitinik nitong manlalaro gaya nina Katherine Bersola, Isa Molde, Justine Dorog, Diane Carlos at Nicole Tiamzon.