Paalam pasok sa semis ng ASBC Youth boxingfest

MANILA, Philippines - Hindi pa panahon upang mamaalam ni Carlo Paalam matapos nitong masiguro ang kanyang tiket sa semifinals ng 2016 ASBC Asian Confederation Youth Boxing Championships na ginaganap sa Pavlodar, Kazakhstan.

Muling inilatag ni Paalam ang kanyang matikas na porma upang patalsikin si Chen Zexin ng China sa pamamagitan ng unanimous win sa light flyweight class (49 kgs.).

Nakuha ng 17-anyos na si Paalam ang boto ng tatlong hurado na mula sa Japan, Belarus at Kazakhstan na pare-parehong nagbigay ng 30-27 sa torneong may basbas ng International Boxing Association.

Sunod na makakasagupa ni Paalam si Pavlyukov Youth Memorial Tournament winner Otabek Kholmatov ng Uzbekistan na umiskor din ng unanimous victory (30-27, 30-27, 30-27) laban naman kay Hsu Cheng-Yu ng Chinese-Taipei.

Sa pagpasok sa semis, nakasisiguro na ng tansong medalya si Paalam.

Sa kabilang banda, hindi pinalad si ASBC Asian Confederation Junior Boxing Championships bronze medalist Ronald Chavez Jr. na makaabot sa medal round ng lightweight event (60 kgs.) matapos matalo kay ASBC Asian Junior Champion Bilolbek Mirzarakhimov ng Uzbekistan sa quarterfinals.

Nagrehistro si Mirzarakhimov ng 3-0 panalo laban sa Pinoy pug, 30-27, 29-28, 30-27.