Jacinto, Dula ibabandera ang Pinas sa Hong Kong meet
MANILA, Philippines - Pinangalanan ng Philippine Swimming League (PSL) ang 28 tankers na sasabak sa 2016 Stingray Invitational Swimming Championships na gaganapin sa Mayo 20 hanggang 22 sa Hong Kong.
Pangungunahan ni Philippine junior record holder Jerard Dominic Jacinto ng University of the East ang kampanya ng koponan kasama si Male Promising Swimmer awardee Marc Bryan Dula ng Weisenheimer Academy.
Inaasahang dodominahin ni Jacinto ang kanyang paboritong 100m at 200m backstroke events sa boys’ 15-year category habang sasabak naman sa boys’ 9-year event si Dula na galing sa impresibong kampanya sa Japan Winter Swimming Championship noong Marso.
Raratsada rin sa naturang three-day meet sina Sean Terence Zamora ng University of Santo Tomas, Micaela Jasmine Mojdeh ng Immaculate Heart of Mary College-Parañaque, Rio Lorenzo Malapitan ng Divine Word College-Calapan, Carmenrose Matabuena ng UE, Lee Grant Cabral ng Diliman Preparatory School at Aalia Jaire Espejo ng Marikina Aquabears.
Kasama rin sa delegasyon sina Sophia Anne Barcelo, Maria Francesca Barretto, Maria Annejanette Carbonell, Jamielyn Chua, Jio Vince Chua, Joey Del Rosario, Alfredo Allen Dizon III, Lyndon Bainer Herrera, Leonard Licudo, Randy Llantino, John Adam Mathew Mabazza, Sophia Dominique Manalang, Carlos Pierre Noble, Marvin Paralisan, Eirik Judiel Rivera, John Leo Paul Salibio, Alliah Saliendra, Kyla Soguilon, Heather Linasan White at Ruben William White.
“We’re optimistic of our chances this time. It’s (Hong Kong meet) one of the toughest tournaments that we’ve been participating for the past years. A lot of good swimmers are coming in like those from mainland China and some European countries such as Germany, Netherlands, England and France,” wika ni PSL President Susan Papa.
Target ng PSL na malampasan ang siyam na gintong nasungkit nito noong nakaraang taon kung saan anim dito ay mula kay Zamora habang ang dalawa ay galing kay Charize Juliana Esmero at isa naman ang nai-ambag ni Stephen Guzman.
Maliban kay Papa, kasama rin sa delegasyon si Sen. Nikki Coseteng, PSL Secretary General Maria Susan Benasa at coach Alex Papa. (CCo)
- Latest
