Pinas binigyan pa ni Obiena ng tanso
MANILA, Philippines – Isang tanso pa ang nadagdag sa kaban ng Pilipinas mula kay Emily Jeane Obiena sa pagtatapos ng 78th Singapore Open Track and Field Championships na ginanap sa National Stadium sa Kallang, Singapore.
Nagkasya sa ikatlong puwesto si Obiena sa women’s pole vault matapos magrehistro ng 3.40 metro habang namayagpag si Jelita Nara Idea ng Indonesia na nagtala ng 3.75m para sa ginto at Rachel Isabel Yang ng Singapore na umukit ng 3.60m para naman sa pilak.
Sa kabuuan, kumana ang Pinoy tracksters ng limang ginto, dalawang pilak at dalawang tansong medalya tampok ang record-breaking performance ni Ernest John Obiena na 5.55m sa men’s pole vault.
Wagi rin ng ginto sina SEA Games champion Christopher Ulboc Jr. (men’s 3,000 steeplechase), Edgardo Alejan Jr. (men’s 400m dash), Mervin Guarte (men’s 1,500m run) at Rosie Villarito (women’s javelin throw).
Nakasiguro ng pilak sina four-time SEA Games titlist Marestella Torres (women’s long jump) at Julian Reem Fuentes (men’s long jump) habang ang isa pang tanso ay mula kay Melvin Calano (men’s javelin throw).
Pormal nang isinumite ng Philippine Amateur Track and Field Association ang pangalan ni Torres para sa 2016 Olympic Games sa Rio de Janeiro, Brazil sa Agosto.
Si Torres ang binigyan ng PATAFA ng universality place sa Olympics upang makasama sa kampanya si Fil-Am Eric Shauwn Cray na nauna nang nakasiguro ng tiket sa Rio Games.
Ang bawat bansa ay binibigyan ng dalawang universality place o token participation - isang babae at isang lalaki - sakaling walang nagkwalipikang atleta sa kanilang bansa.
- Latest
