Foton nalagay sa ‘Group of Hope’

MANILA, Philippines – Hindi naiwasang mapangiti ni Foton team manager Alvin Lu matapos ang draw ceremony para sa Asian Women’s Club Championship.

Nabunot ang Toplanders para sa “Group of Hope” kung saan nila makakalaban ang mga mas magaang na Hong Kong at Vietnam sa naturang torneo na nakatakda sa Sept. 3-11.

“We like our chances, it was a favorable draw,” wika ni Lu sa draw ceremony na dinaluhan nina volleyball chief Joey Romasanta, Asian Volleyball Confederation marketing at development committee chair at Superliga founder Tatz Suzara at  AVC delegate  Jaksuwan Tocharoen ng Thailand.

Kukunin ng Foton sina Aby Maraño ng F2 Logistics, Jen Reyes at Aiza Maizo-Pontillas ng Petron, Rachel Daquis, Jovelyn Gonzaga, Tina Salak at Honey Royse Tubino ng RC Cola-Army.

Sina Americans Ariel Usher at Lindsay Stalzer ay inaasahan ding huhugutin ng Toplanders.

“We want to prepare early and form the strongest team possible because we want to make the country proud,” wika ni Lu na umaasang makakapasok ang Toplanders sa Final Four.

Ang Hong Kong ang unang makakalaban ng Foton sa Setyembre 3 kasunod ang Vietnam kinabukasan.

Makakasama naman ng Thailand, ang nagdodomina sa Southeast Asian Games, sa Group B ang North Korea at Iran, habang nasa Group C ang Japan, Kazakhstan at Indonesia.

Ang Group D ay binubuo ng Asian powerhouse na China, Chinese Taipei, Malaysia at Turkmenistan na siyang sinasabing “Group of Death.”