Bakbakang umaatikabo sa serye ng Aces at Painters
MANILA, Philippines – Nagsagupa na sila sa semifinal round ng nakaraang PBA Governors' Cup kung saan inungusan ng Rain or Shine ang Alaska, 3-2, sa kanilang best-of-five series.
Sinabi ni Aces' head coach Alex Compton na isang matinding serye ang muling masasaksihan ng mga PBA fans sa kanilang best-of-seven semifinals duel ng Elasto Painters sa 2014-2015 PBA Philippine Cup.
“I expect that to be a great series. I expect that to be like our elims match that came down to the last play,” Compton.
Nakatakda ang Game One bukas sa Mall of Asia Arena sa Pasay City.
Sa kanilang unang pagkikita sa elimination round ay tinakasan ng Elasto Painters ang Aces, 98-95.
Walang masamang sinabi si Compton kay Guiao at sa halip ay pawang pagpuri ang kanyang sinagot sa post game interview sa kanya noong Linggo matapos ang 87-69 panalo sa Meralco sa ikalawang knockout phase ng quarterfinals.
“Si coach Yeng ay isa sa pinakamagaling na coach sa liga,” sabi ni Compton, naging assistant ni Guiao sa Rain or Shine. “Sa kanila ako nagsimula ng coaching ko and I respect coach Yeng and the whole Rain or Shine organization.”
“The hardest player I’ve ever played with is my brother. You can love and still play your best. The game shouldn’t affect the relationship,” dagdag pa ng American coach.
Bagama't nirerespeto niya si Guiao, hindi naman maaaring maging magalang si Compton sa kanilang semifinals showdown.
Lalo na at dalawang knockout matches ang dinaanan ng Alaska para lamang makapasok sa semis at makaharap ang Elasto Painters.
Kinailangang talunin ng Alaska ang NLEX Road Warriors at ang Meralco Bolts sa dalawang 'do-or-die' games sa quarterfinals.
Awtomatiko namang nakamit ng Rain or Shine ang No. 2 berth sa semifinals makaraang tapusin ang eliminasyon sa 9-2.
- Latest
