Jeff Chan nanghinayang sa tsansang makalaro si Ginobli

MANILA, Philippines – Dismayado at nanghihinayang si Gilas Pilipinas shooting guard Jeff Chan matapos marinig ang balitang hindi na makalalaro si NBA superstar Manu Ginobli sa FIBA World Cup ngayong buwan.

Sinabi ni Chan na nais pa naman niyang makalaban si Ginobli na manlalaro sana ng Argentina na kasama sa bracket ng Pilipinas.

"Gusto ko talaga siya makalaro pero wala tayo magagawa kasi injured [yata] siya,” wika ni Chan ngayong Biyernes.

May iniindang stressed fracture sa kanyang kanang binti si Ginobli na kapapanalo lamang ng championship sa NBA para sa koponan ng San Antonio Spurs nitong Hunyo.

"Pero kung wala siya, excited pa rin ako maglaro because ang mga kalaban natin dito magagaling at sila yung mga top countries sa buong mundo," banggit ni Chan.

Bukod sa Argentina, makakalaban pa ng Pilipinas ang Croatia, Greece, Puerto Rico at Senegal.