Khan nais makalaban si Pacquiao sa Mayo
MANILA, Philippines - Hindi mawawalan ng makakalaban si Manny Pacquiao sa unang hati ng 2015.
Ipinahayag ni 27-anyos British boxer na si Amir Khan na nais niyang sukatin ang dating sparring partner na si Pacquiao sa Mayo kung hindi matutuloy ang hangad na laban kontra kay Floyd Mayweather Jr.
Si Pacquiao ay nakatakdang magdepensa ng WBO welterweight title sa Nobyembre 22 laban kay Chris Algieri habang si Khan na WBA Silver at International welterweight champion ay inaasahang sasampa uli ng ring sa Disyembre kontra alinman kina Robert Guerrero o Devon Alexander.
Nauna nang ikinonsidera si Khan para makalaban ni Mayweather sa Setyembre pero naudlot ito at pinili ng pound for pound king ang bigyan ng rematch si Marcos Maidana.
“If the Mayweather fight happens, it happens. If it doesn’t, it doesn’t,” wika ni Khan sa The Telegraph.
Wala namang nakikitang problema si Khan kung si Pacquiao ang kanyang tutukan dahil katulad siya ni Mayweather na tinitingala sa pinaglalabanang dibisyon.
“Manny Pacquiao is another name. What a great story line that would make. Amir Khan fighting his old sparring partner and friend, Manny Pacquiao,” dagdag nito.
Nagkasama sa pagsasanay sina Khan at Pacquiao dahil dating sinasanay ang una ni Freddie Roach.
Wala namang maibigay na prediksyon si Khan sakaling matuloy ang laban dahil wala umanong nabago sa istilo at lakas ni Pacman.
Sakaling maganap ang naunang hinangad na laban kontra kay Mayweather, matibay ang paniniwala ni Khan na mananalo siya dahil hirap ang walang talong WBC champion sa mga mabibilis na boxers tulad niya.
- Latest
