EDITORYAL - No way!
DAPAT lang na hindi pumayag si Pres. Rodrigo Duterte sa alok ng terorista na palit-ulo o pakikipag-swap sa mga bihag kapalit ng pagpapalaya sa ama at ina ng Maute brothers na naaresto ng military. Sabi ni Abdullah Maute, tumatayong leader ng mga terorista na palalayain nila ang mga bihag, kabilang si Fr. Chito Suganob kung palalayain din ang kanyang ama na si Cayamora Maute at ina na si Ominta Farhana Maute. Ang mensahe ni Abdullah ay pinadala noong magtapos ang Ramadan.
No way! Ito ang sagot ni Duterte. Hindi makikipagnegosasyon sa mga terorista kahit kailan. Sabi naman ni Presidential Spokesman Ernesto Abella na hindi matitinag ang gobyerno sa alok na palit-ulo. Hindi ito kailanman kakagatin ng pamahalaan. Ang nangyari raw negosasyon noong Linggo na humiling ng walong oras na humanitarian pause o ceasefire ay walang kinalaman ang pamahalaan. Mga religious leaders umano ang nagbalak niyon. Ganunman kahit na nagkaroon ng walong oras na ceasefire, patuloy din naman ang pagpapaputok ng Maute. Hindi rin sumunod ang mga terorista. Kaya makaraan ang itinakdang walong oras, balik uli ang AFP sa pambobomba sa kuta ng Maute. Kahapon, muling binomba ang pinagtataguan ng mga terorista. Sabi ng AFP maaaring sa susunod na buwan ay matatapos na ang bakbakan sa Marawi at maibabalik na sa normal ang buhay doon. Libong residente ang nasa evacuation centers.
Ipagpatuloy ang pagbomba sa mga pinagtataguan ng Maute. Kahit pa sinabing nakatakas na raw si Isnilon Hapilon sa Marawi, huwag pa ring titigil ang AFP. Maaaring taktika lang ang sinasabing nakatakas na ang mga pinuno ng terorista.
Huwag papayag sa palit-ulo. Sa halip, sikapin ng AFP na mabawi ang mga bihag nang ligtas. Gumawa nang paraan na makuha ang pari at iba pabng bihag na umano’y inaabuso ng Maute. Ilang babae na raw ang ginagahasa at ang mga lalaking bihag ay inuutusang magnakaw sa mga bahay. Gawin ng AFP ang lahat para ma-rescue ang mga bihag.
- Latest
