Init ng panahon, palusot ng MRT-3
HINDI matanggap ni Railways Usec. Cesar Chavez na init ng panahon ang nagpapatirik ng tren ng MRT-3. Sa apat na taon niya bilang assistant general manager ng sister-LRT-1 at -2, hindi niya narinig ang gan’ung palusot. Malamang na pabayaang maintenance ang totoong dahilan.
Ibinintang ng MRT-3 at maintenance contractor nito sa pagsapit ng tag-init kaya araw-araw tumitirik ang mga tren. Magkapareho ang pahayag sa news videos nina MRT-3 operations-in-charge Deo Manalo at Busan Universal Rail Inc. president Eugene Rapanut. Kesyo raw mas mabilis mabulok ang components kapag tag-init, at baka hindi angkop ang grasa sa klima sa Pilipinas.
Gumugulong ang MRT-3 mula taong 2000, pero ngayon lang sa ilalim ng dalawa ito bumibigay sa summer heat. Si Manalo, na dati’y nasa mother-Dept. of Transport, ay naging MRT-3 OIC-maintenance, tapos OIC-general manager, tapos-OIC-operations, sa loob lang ng anim na buwan mula nung Setyembre. Ang BURI ni Rapanut ay naging tatlong-taong maintenance contractor mula lang Enero 2016.
Sinusuri kung bumibili ng tamang piyesa at gumagawa ng tamang trabaho ang BURI, ani Chavez. Mula nu’ng Oktubre ibininbin muna ang buwanang P54.5-milyong singilin hangga’t hindi naisusumite ang mga kailangang dokumento. Kabilang dito ang pag-order, bayad, deliber, pagtanggap, quality check, at pagkabit ng piyesa. Walang papeles, walang bayad, iginiit ni Chavez ang dating patakaran na nilabag ng mga dating DOTr officials.
Nu’ng taglamig nag-ala-enhinyero ang abogado ng BURI, at nagpalusot na madalas din ang breakdowns dahil mula’t-sapol ay hindi akma ang mga lumang tren sa riles. Tahimik lang siya tungkol sa 48 bagong bagon mula China na hindi mapaandar. Sina kambal-tuko Manalo ang DOTr expansion project manager at Rapanut ang broker ng Chinese supplier nang orderin ang 48 bagon nu’ng 2013-2014.
- Latest