Pag-ibig na walang hanggan
Ang kagandahan mo nang unang makita
puso ko’y tumibuk-tibok na kaba;
Para bang ang buhay sa aki’y gumanda
at ang dalamhati’y naparam na bigla
Sa mga labi mong simpula ng rosas
nais kong idampi mga labing mamad;
Sa mga ngiti mo’y aking namamalas
ang libong pag-asa at magandang bukas
Ang mga pisngi mong namumula-mula
ay nais kong hagkan sa pangungulila;
Sa mga titig mo’t malamlam na mata
ibig mag-umalpas pusong sumisinta
Sa leeg mo sinta’y hangad kong ikintal
ang suyo ng labing walang katapusan;
Mula sa leeg mo’y nais ko rin hirang
ihaplos ang halik sa dibdib mong yaman
Napapansin mo bang tuwing magkikita
ang kagandahang mo’y sinasamba-samba;
Ang mga sulyap ko’y lihim na paghanga
sa kagandahan mong tangi’t pambihira
Ang puso’t ang diwa’y papaglunduin
sa katauhan mong ilaw sa panimdim;
Ang lahat sa iyo’y nais kong samyuin
upang ligaya’y lubos na maangkin
Ang kagandahan mo’y buhay na larawan
ng isang babaing ngala’y Bathaluman
Ikaw din ang Venus -- tanging Paraluman
na iibigin ko hanggang kamatayan
- Latest