Company driver lasog sa elevator
MANILA, Philippines — Dedo ang isang 52-anyos na company driver nang biglang tumalon sa gitna nang pagloloko ng cargo elevator sa Quiapo, Maynila, ayon sa ulat kahapon.
Binawian nang buhay habang nilalapatan ng lunas sa Chinese General Hospital si Manolito Naguit, driver ng Solar Up Rise Marketing na matatagpuan sa San Diego Building sa Carlos Palanca Sr. St., Quiapo at residente ng no. 695 –G Unit 4 , Laguna Extension, Gagalangin,Tondo.
Sa ulat ni SPO2 Bernardo Cayabyab ng Manila Police District-Homicide Section, naganap ang insidente alas -12:00 ng tanghali nitong nakalipas na Huwebes sa loob ng kompanya.
Pababa umano ang biktima at iba pa mula sa ika-3 palapag ng gusali nang magloko ang cargo elevator na sinasakyan na ikinabahala ng mga sakay at inatake umano ng nerbiyos ang biktima kaya nagawang tumalon dahil open-elevator naman umano.
Naipit at nalasog ang katawan ng biktima habang hindi naman nasaktan ang mga nanatili sa elevator.
Itinakbo siya sa nasabing pagamutan subalit idineklarang dead on arrival.
- Latest