Suspek sa bank employee rape-slay, arestado!
Ang prime suspect sa panggagahasa at pagpatay sa biktimang si Mabel Cama na si Randy Oavenada matapos siyang matimbog ng mga pulis-EPD sa Pasig City kahapon. Non Alquitran
MANILA, Philippines — Naaresto na ng mga tauhan ng Eastern Police District (EPD) ang sinasabing pangunahing suspek sa brutal na panghahalay, pagpatay at pagsunog sa bangkay ng 22-taong gulang na bank employee sa Pasig City na naganap noong Nob. 12 ng gabi.
Kinilala ni EPD Director Chief Supt. Romulo Sapitula ang suspek na isa umanong drug addict na si Randy Oavenada, nasa hustong gulang, residente ng Ortigas Avenue Extension Compound, Brgy. Rosario, Pasig City.
Ayon kay Supt. Orlando Yebra, hepe ng Pasig City Police, si Oavenada ay isa sa limang “persons of interest” na isinailalim nila sa drug test, interogasyon, at sa fingerprint sa katawan ng biktimang si Mabel Cama.
Sinabi ni Yebra, lumitaw sa isinagawang crime laboratory sa fingerprints mula sa katawan at cellphone ng biktima na positibong si Oavenada ang siyang pangunahing suspek sa pagpatay kay Cama.
“Lumabas din po sa isinagawa naming drug test kay Oavenada na positibong gumagamit siya ng droga, kaya namin siya inaresto,” pahayag ni Yebra.
Nakakulong ngayon si Oavenada sa detention facility ng Pasig police at nakatakdang isailalim sa inquest proceedings sa Pasig City Prosecutor’s Office ngayong Lunes.
Sa ngayon ay hinihintay pa ng Pasig Police ang resulta ng crime laboratory sa iba pang natukoy nilang persons of interest.
Magugunita na noong Linggo ng umaga, natagpuan ang hubad na katawan ni Cama sa isang abandonadong gusali na may 40 metro ang layo mula sa kanyang bahay sa Ortigas Avenue Extension, Brgy. Rosario.
Ilang oras bago natagpuan ang bangkay ni Cama ay may nagtangkang sumunog sa gusali, pero naapula ito ng mga residente. Wala namang residente na pumasok sa gusali kaya inabot pa ng tanghali bago nakita ang bangkay ni Cama.
Isang saksi ang huling nakakitang buhay sa dalaga habang kumakatok siya sa gate ng kanilang residential compound noong Biyernes ng gabi.
Batay sa narekober na cellphone ng biktima, dalawang beses pa siyang nakapag-text sa kanyang kapatid na pagbuksan siya ng gate, alas-11:41 at alas-11:47 ng gabi habang ang ikatlong text message ng biktima dakong alas-12:47 noong Sabado ng umaga ay hindi na nai-send.
Habang kumakatok ang dalaga sa gate, ilang lalaki ang nakita ng saksi na umaaligid sa lugar na ngayon ay kabilang sa mga persons of interest.
- Latest
