2 ‘tulak’ bulagta sa Maynila
MANILA, Philippines - Dalawa na namang hinihinalang ‘tulak’ ang iniulat na nasawi nang manlaban sa ikinasang buy-bust operation ng mga tauhan ng Manila Police District (MPD) sa Sta. Cruz, Maynila kamakalawa ng gabi.
Kinilala ang mga nasawing suspek na sina Jay-Ar Dayto, 41, at Vincent Corales, 41 kapwa residente ng LRC Compound Sta. Cruz, Maynila.
Sa inisyal na ulat ng Manila Police District-Station 3, nagsagawa ng buy-bust at ‘one time, big time’ operation istasyon dakong alas-8 ng gabi sa LCR Compound, Recto Avenue, Sta. Cruz, Maynila.
Nakikipagtransaksyon si Dayto sa isang poseur buyer nang makutuban niya na pulis ang katransaksyon niya. Binunot niya ang kanyang kalibre .38 at pinaputukan ang pulis na nagawa namang makailag. Bumawi naman ang isang back-up na pulis ng putok dahilan upang magtamo ng tama si Dayto at matumba.
Narinig naman ni Corales ang putukan dahilan upang lumabas siya sa kanyang kwarto at paputukan ang mga operatiba. Muling nakailag ang mga pulis at nabaril ng isa sa kanila si Corales dahilan ng kanyang kamatayan. Narekober sa mga suspek ang dalawang kalibre .38, tatlong bala ng baril, tatlong basyo ng mga bala at walong pakete ng hinihinalang shabu.
- Latest