Riprap gumuho, 2 bahay nawasak
MANILA, Philippines – Bumagsak ang dalawang bahay makaraang gumuho sa ikalawang pagkakataon ang riprap sa gilid ng ilog sa Marikina City, kahapon ng umaga.
Sa kabutihang palad ay nasa evacuation center na ang mga nakatira sa dalawang bahay na bumagsak kaya walang nasaktan sa mga residente ng Brgy. Nangka, Marikina City noong gumuho ang riprap.
Nabatid sa Marikina rescue 161 na dakong alas-5:30 ng umaga noong gumuho ang riprap dahil lumambot ang lupa bunsod ng halos magdamag na pag-ulan.
Sinabi naman ni Marikina City Mayor Marcelino Teodoro na inabisuhan na nila ang lahat ng nakatira malapit sa gumuhong riprap at pampang ng ilog na pansamantalang lumikas sa ligtas na lugar upang makaiwas sa trahedya.
Hinala ng Alkalde na mahina ang pagkakagawa ng Department of Public Works and Hi-Ways (DPWH) sa nasabing mga riprap.
Una dito, noong linggo ng umaga ay dalawang beses gumuho ang riprap sa nasabing lugar at muling nasundan kahapon.
- Latest