Sa Caloocan, Valenzuela at Pasay: 6 pang dawit sa droga, bulagta
MANILA, Philippines – Anim na kalalakihan na sangkot umano sa illegal na droga ang nasawi matapos pagbabarilin ng hindi pa nakikilalang mga suspect sa magkakahiwalay na insidente sa Caloocan, Valenzuela City at sa Pasay City.
Sa Caloocan kinilala ni Senior Supt. Johnson Almazan, hepe ng Caloocan City Police ang mga nasawing sina Lawrence Bisnan, 41; Joey Grabe; Dennis Abartosa, 40 at Patricio Liego, 35.
Ayon sa pulisya, alas-3:00 ng madaling-araw nang pagbabarilin si Bisnan ng riding in tandem habang nakatayo sa harapan ng kanyang bahay.
Pagsapit naman ng alas-2:28 ng madaling-araw habang bumibili sa isang tindahan si Grabe sa Phase 4, Package 1, Brgy 176, Bagong Silang ay pinagbabaril din ito ng isang hindi nakikilalang lalaki na naka-bonnet na naging dahilan ng agaran nitong kamatayan.
Ala-1:05 ng madaling-araw ay nakatanggap ng report sina PO1 Harold Laguna at PO1 Christian Panganiban, ng Police Community Precinct (PCP) 3, Caloocan City Police na may naganap na barilan sa Phase 4, Brgy. 176 at sa kanilang pagresponde ay nakita nilang duguang nakahandusay sa semento si Abartosa.
Ang hindi naman nakikilalang suspect ay mabilis na tumakas matapos na isagawa ang pamamaril.
Ala-1:00 naman ng madaling-araw ay nabaril si Liego nang mang-agaw umano ng baril sa isa sa mga pulis ng umaresto sa kanya dahil sa kaso ng pagtutulak ng illegal na droga habang nasa loob sila ng mobile police patrol car sa Brgy. 176, Bagong Silang ng naturang lungsod.
Samantala, sa Valenzuela City, binaril at napatay naman ng hindi pa nakikilalang suspect ang biktimang si Rodrigo Penollar, alas-2:00 ng madaling-araw.
Ayon sa Valenzuela City Police, kaagad na binawian ng buhay ang biktima sanhi ng ilang tama ng bala sa katawan buhat sa hindi pa batid na kalibre ng baril.
Lumalabas sa rekord ng pulisya, na ang limang biktima na napatay ay pawang sangkot umano sa droga.
Sa Pasay City, patay din si Ryan Mariano, 35, nakatira sa Vergel St., ng naturang lungsod, sanhi ng tinamong ilang tama ng bala sa katawan buhat sa isang kalibre .45 baril.
Naganap ang insidente alas-4:00 ng hapon sa kahabaan ng Vergel St., Brgy. 119, Zone 14 ng nasabing siyudad habang ang biktima ay nakatayo sa nasabing lugar nang biglang dumating ang suspect na nakasuot ng helmet at pagbabarilin ito.
Dalawang anggulo ang tinitingnan ngayon ng pulisya, posibleng paghihiganti at may kinalaman sa droga.
Dahil noong nakaraang buwan ay may nakaaway ang biktima na may kaugnayan sa sugal na cara y cruz at nalaman din na ito ay gumagamit ng droga at part time din itong tulak.
- Latest