Holdaper na taxi driver, sumalakay

MANILA, Philippines - Muling umatake ang mga holdaper na nagpapanggap na taxi driver makaraang mabiktima ang isang ginang ng dalawang salarin, kamakalawa ng gabi sa Caloocan City.

Sa pahayag sa pulisya ng biktimang si Luzviminda Marcos, 45, alas-9:30 ng gabi ay sakay siya ng taxi na hindi na nakuha ang plaka at pagsapit sa Sangandaan ng lungsod ay pinara ng isang lalaki.
Nagulat ang biktima nang hintuan ng taxi driver ang lalaki at hinayaan makapasok sa loob ng sasakyan.  Dito tinutukan ng holdaper si Marcos ng patalim at sapilitang tinangay ang P29,000 cash na gagamitin sana nito sa pamamakyaw ng isda.

Matapos malimas ang pera, sapilitang pinababa ng holdaper si Marcos sa taxi saka humaharurot na tumakas. Sinabi ng biktima na aral na sa kanya ang insidente kaya sa susunod na sumakay ng taxi ay agad na kukunin na ang plaka nito at body number.