Pambansang Awit inisnab, kelot kalaboso
Bayle Einstein F. Gonzales
PAMPANGA, Philippines — Rehas na bakal ang binagsakan ng 20-anyos na lalaki matapos itong arestuhin dahil hindi tumayo bilang pagbibigay-galang habang pinatutugtog ang Lupang Hinirang sa sinehan sa Angeles City, Pampanga noong Sabado.
Base sa ulat ng Angeles City Police Station, nakatakdang kasuhan ang suspek na si Bayle Einstein F. Gonzales, 20, ng Purok Maligaya, Barangay Abogado sa bayan ng Panique, Tarlac.
Ang suspek ay ini-report at ipinaaresto sa mga awtoridad ni Charge d’ Affaires Elmer Cato na nagkataong nasa loob din ng sinehan kung saan ang bastos na lalaki ay nakaupo sa unahan nito.
Nabatid na si Cato ay hepe ng mission sa Phil. Embassy sa Baghdad, Iraq.
Nabatid na bago pa man magsimula ang palabas na pelikula na “Justice League” ay pinatatayo ni Cato si Gonzales upang magbigay respeto sa pambansang awit na tinutugtog.
Gayunman, hindi nakinig si Gonzales sa ikalawang pagkakataong sinabihan at tuloy pa rin sa pagkain ng popcorn gayong lahat ay tumayo sa pambansang awit kabilang ang ilang dayuhan na nasa loob ng sinehan.
Upang turuan ng leksyon matapos ang palabas sa sinehan ay agad na humingi ng tulong si Cato sa mga pulis at ipinaaresto ang suspek.
Agad na dinala sa presinto ang suspek na ngayo’y nahaharap sa kasong paglabag sa Flag and Heraldic Code of the Philippines.
Alinsunod sa nasabing batas, ang lahat ay dapat na magbigay-galang at tumayo sa tuwing aawitin o patutugtugin ang pambansang awit na sumisimbolo sa bansa.
Nabatid na tinatayang aabot sa P5,000 hanggang P 20,000 at posibleng makulong ng hanggang isang taon ang sinumang lalabag sa nasabing batas.
- Latest
