3 Briton, 35 Pinoy huli sa investment scam
MANILA, Philippines - Nalambat ng mga ahente ng National Bureau of Investigation (NBI) ang tatlong British nationals at 35 mga Pinoy ng kompanyang nagbebenta ng pekeng stocks, bonds, debentures at securities sa labas ng bansa, sa ulat kahapon.
Nitong Abril 4, 2017 nang salakayin sa pamamagitan ng search warrant na inisyu ni Judge Cynthia Marino-Ricablanca ng Fourty Judicial Region, Santa Cruz, Laguna, ang PLUSTEL Solution Inc., na matatagpuan sa 3rd Floor ng no. 88 Bldg., Governors Drive, Brgy. Maduya, Carmona, Cavite.
Inaresto ng mga ahente ng NBI-ang mga suspek na Briton na kinilalang sina Andrew Robson, Graham Allan Bennet at Dominic Whellams, company consultant, Trainor at Information Technology (IT) expert.
Binitbit din ng International Operations Division (IOD) ng NBI kasama ang mga kinatawan ng Enforcement and Investor Protection Department ng Securities and Exchange Commission (SEC) ang nasa 35 mga personnel ng kompanya na naaktuhan sa kanilang online selling ng securities at iba pang produkto tulad nito .
Bukod pa sa 38 na isinalang na sa inquest proceedings sa Department of Justice kaugnay sa paglabag sa Securities Regulation Code (in relation to the Cybercrime Prevention Act of 2012) at Republic Act 8799 (in rel. to R.A. 10175), iniimbestigahan na rin ang nasa 172 pang mga manggagawa na pawang tauhan bilang data miners, qualifiers at verifiers, na nasa kustodiya ng NBI.
Nakatanggap umano ang NBI ng impormasyon hinggil sa operasyon ng kompanya kung saan nabiktima na ang ilang katao mula sa engineering, oil , gas at iba pang manufacturing industries.
Wala umanong permit at lisensiya mula sa SEC ang nasabing kompanya bukod sa non-existence ang mga produkto o stocks na kanilang ibinebenta.
- Latest