Bangko wa hatagi og Mayor’s Permit

CEBU, Philippines - Wala aprubahi ni Mayor Tomas Osmeña ang aplikasyon sa Mayor’s Permit sa 27 ka branch sa usa ka bank company kay giingong wala makahatag sa mga rekisitos.

Sa suwat nga gipadala sa kagamhanan sa Siyudad sa Sugbo ngadto sa maong bangko, nakalatid nga pakyas sila sa pag-submit sa “notarized joint statement” nga required sa Department of Finance Local Finance Circular alang sa business permit renewal. Giingong mandatory ang pag-submit niini aron makahatag og insaktong basehan ang City Treasurer sa pag-compute sa collectible local business taxes.

Kay wala man makahatag sa maong dokumento ang maong bangko, gi-deny sa mayor ang ilang application alang sa Mayor’s Permit alang sa 27 ka branch. Hinuon adunay usa ka branch nga wala malakip ug kini nahimutang sa usa ka mall sa may SRP sanglit bag-o pa kini.

Kahinumduman nga mipasaka og kaso si Osmeña batok sa Magallanes-Plaridel Branch sa maong bangko niadtong buwan sa Enero kay giingong wala kini mibayad sa insaktong buhis. Apan ang korte mipagawas og Preliminary Injunction nga nagmando sa siyudad nga dili pasirad-an ang 28 ka branch niini.

Gitataw sa mayor nga kun makapagawas na og desisyon ang korte ug hatagan siya og pagtugot nga pasirad-an ang maong bangko, iya kining buhaton. Hinuon hatagan niya’g panahon ang mga depositor nga magsugod na sa pagpangita og laing bangko. (BANAT NEWS)