Shabu itinuturok na ngayon
MANILA, Philippines — Nag-level up na rin sa paggamit ng shabu ang mga drug addict na kung dati ay sinisinghot ngayon ay itinuturok na sa katawan.
Ito ang ibinulgar kahapon ni Quezon City Police District (QCPD) Director P/Chief Supt Guillermo Eleazar dahil sa kumakalat na ngayon sa merkado ang isang uri ng shabu na itinuturok sa katawan matapos masakote ang sampung drug peddlers.
Nasamsam sa 10 suspek ang P 100,000 halaga ng shabu sa isang buy bust operation kahapon ng madaling araw at sa isang hotel sa Imperial St., Brgy E. Rodriguez Sr. , Cubao, Quezon City.
Ang mga nasakoteng suspect ay kinilalang sina Marco Paulo Cruz, alyas Baste, massage therapist, 24; Roseller Belleza Jr., 30; John Paul Mallari, 25; Darcy Mendoza, 37.
Ang mga kliyente na tinuturukan ng shabu ay sina Glenn Llamira, 25;Jovani Guimeroy, 32; Hyan Rey Ilaguison, 30; Dan Harold Quintos, 26; Jovir Agpoon, 28 at Mark Anthony Gretchen, 30.
Si Cruz ay natukoy na mastermind at maintainer ng drug den na nago-operate sa tulong nina Belkeza, Mallari at Mendoza.
Ang modus operandi ng mga ito ay iturok ang pinulbos na shabu na tinunaw at inilagay sa heringilya na ituturok sa punong ugat sa ilalim ng siko ng kanilang mga kliyente.
Anim sa mga kustomer ng mga suspect ay nahuling tinuturukan sa nasabing raid.
Nabatid na bandang alas-3:45 ng madaling araw nang masakote ang mga suspect ng mga elemento ng District Drug Enforcement Unit (DDEU), District Special Operations Unit (DSOU), Philippine Drug Enforcement Agency (PDEA) RO-NCR at Station Drug Enforcement Unit (SDEU) ng Cubao Police Station (PS-7) sa buy bust operation sa No. 434 Lykes Hotel ng lungsod.
Nasamsam mula sa mga suspek ang 35 sachets ng shabu, heringilya, drug paraphernalias, P2,089.00 cash at buy bust money.
- Latest
