Encounter: 5 Maute terrorists patay sa MILF fighters
MANILA, Philippines – Napatay ang limang miyembro ng Maute terror group habang isa namang kasapi ng Moro Islamic Liberation Front (MILF) ang nasugatan matapos na magkasagupa ang dalawang armadong puwersa sa hangganan ng Lanao del Sur at Maguindanao kamakalawa.
Kinumpirma ni MILF Vice Chairman for Military Affairs Von Al Haq ang bakbakan ay nangyari nitong Biyernes ng umaga.
Nabatid na nagkrus ang landas ng Maute terror group at ng MILF na nagkukuta sa lugar na nagresulta sa bakbakan ng magkabilang panig.
Ang Maute terror group ay target ng opensiba ng militar sa lalawigan ng Lanao del Sur kung saan nasa 63 na sa mga ito ang napapatay habang marami pa ang nasugatan.
Sa panig naman ni Major Gen. Carlito Galvez Jr., 6th Infantry Division (ID) Commander, ang mga nakasagupang Maute terror group ng MILF ay mga nagsisitakas sa opensiba ng militar sa Butig, Lanao del Sur.
Nabatid na ang sagupaan ng dalawang puwersa ay umabot hanggang kagubatan ng Mt. Cararao, ang teritoryo kung saan sinasanay ng mga dayuhang terorista ang nasabing grupo.
Ayon pa sa report, isa naman sa MILF fighters ang nasugatan sa nasabing bakbakan na mabilis na isinugod sa pagamutan.
Samantalang alinsunod sa kasunduan ng MILF sa pamahalaan ay makikipagtulungan ang mga ito laban sa pagsupil sa mga teroristang grupo na magagawi sa kanilang teritoryo.
- Latest