Opisyal ng barangay itinumba habang nagdya-jogging
MANILA, Philippines - Dead on the spot ang isang opisyal ng barangay nang siya ay pagbabarilin ng apat na lalaki habang nagdya-jogging kahapon ng umaga sa Sto. Domingo Street, Brgy. Holy Spirit, Quezon City.
Ang biktima na nasawi dahil sa mga tama ng bala sa iba’t ibang bahagi ng katawan ay kinilalang si Rodante Sanchez, 51, Assistant Administrator ng Brgy. Holy Spirit ng lungsod.
Batay sa ulat, dakong alas-5:52 ng umaga ay nagdya-jogging ang biktima nang lapitan ito ng apat na suspek at walang kaabog-abog na pagbabarilin.
Narekober sa crime scene ang pitong basyo ng bala ng hindi pa natukoy na kalibre ng baril at isang karatula na may nakasulat na “Pusher Ako, huwag tularan, baka matulad kayo sa akin, kaya mga kasamahan kung pusher lumayas na kayo dito kung mahal pa ninyo ang buhay ninyo”.
Isa sa sinisilip ng otoridad sa motibo ng pamamaslang ay onsehan umano sa bentahan ng droga.
- Latest
