Westbrook, Thunder tinalo ang 76ers sa triple overtime
Naghanap ng mapapasahan si Thunder guard Russell Westbrook nang makorner ni 76ers center Joel Embiid.
PHILADELPHIA -- Kahit sa isang triple-overtime game ay hindi sumuko si Russell Westbrook.
“Never stop, never stop. I have been grinding my whole life. I was never given anything,” sabi ni Westbrook, lumaki sa south Los Angeles. “I don’t care about percentages. All I care about is wins.”
Nagposte si Westbrook ng triple-double sa kanyang tinapos na 27 points, 17 rebounds at 15 assists para tulungan ang Oklahoma City Thunder na mailusot ang 119-117 triple-overtime victory kontra sa 76ers.
Ito ang pang-10 triple-double ni Westbrook ngayong season at ika-89 sa kanyang career.
Nagtala si Westbrook ng 10-of-33 fieldgoal shooting at isa lamang sa dalawang Thunder players na naglaro ng higit sa 50 minuto.
Naglaro si Westbrook sa loob ng 52 minuto, habang si slotman Steven Adams ay ibinabad sa kabuuang 51 minuto.
Nagdagdag sina Paul George at Carmelo Anthony ng tig-24 points para sa Oklahoma City, nakuha ang kanilang ikatlong sunod na road win at ika-17 dikit na pagdomina sa Philadelphia.
Pinamunuan naman ni star center Joel Embiid ang Sixers mula sa kanyang 34 points sa loob ng 48 minuto.
Nag-ambag si J.J. Redick ng 19 points kasunod ang 16, 14 at 12 nina Dario Saric, Jerryd Bayless at Ben Simmons, ayon sa pagkakasunod.
Sa Milwaukee, kumamada si Bobby Portis ng career-high na 27 points at humakot ng 12 rebounds para igiya ang Chicago Bulls sa 115-109 panalo laban sa Bucks.
Ito ang pang-limang dikit na ratsada ng Bulls, nakakuha sa nagbabalik na si shooting center Nikola Mirotic ng 22 points.
Hindi nakalaro ang Chicago center sa pagsisimula ng season dahil sa facial fractures mula sa suntukan nila ni Portis sa training camp.
Nakumpleto ni Mirotic ang isang three-point play sa huling 1:07 minuto ng fourth quarter para ibigay sa Bulls ang 112-107 abante laban sa Bucks.
Binanderahan ni star center Giannis Antetokounmpo ang Milwaukee mula sa kanyang ipinosteng 29 points at 16 rebounds.
Umiskor din si Khris Middleton ng 29 markers, habang nag-ambag si Eric Bledsoe ng 12 points at 7 assists para sa Milwaukee.
- Latest
