San Beda bubuksan ang title defense sa football
MANILA, Philippines — Sisimulan ng back-to-back champion na San Beda College ang kanilang title retention bid sa pagharap sa Emilio Aguinaldo College sa pagbubukas ng NCAA Season 93 football competition sa Rizal Memorial track and football Stadium sa Biyernes.
Target ng Red Booters na makopo ang ika-22 titulo sa liga upang makakalas sa pagkakatabla nila ng dating miyembrong La Salle Green Booters bilang most winningest squad sa seniors’ division.
Magsasagupa ang San Beda at ang EAC sa alas-2 ng hapon.
Nagdomina sa nakalipas na dalawang dekada sa NCAA football ang San Beda matapos mapanalunan ang 14 sa huling 16 na korona.
Nabigo lamang silang maghari noong 2009 at 2015 nang magwagi ang St. Benilde at Arellano University, ayon sa pagkakasunod.
Sa iba pang mga laro sa opening day, magtutuos ang St. Benilde at Mapua sa ikalawang laban sa alas-4 ng hapon na susundan ng bakbakan ng Arellano at Perpetual Help sa alas-6 ng gabi.
“It’s going to be an exciting football season, that’s for sure,” wika ni Arellano athletic director Peter Cayco, ang chairman ng event organizing committee.
Ipagtatangol din ng San Beda ang kanilang juniors crown na sisimulan nila sa pagsagupa sa Perpetual Help sa Nobyembre 27.
- Latest