Pagminahalay nga makalipay

Ang pagminahalay maoy mando sa atong pagbati nga napahiluna sa kahiladman sa atong kasingkasing. Gipabuhi kini sa enerhiya sa gugma, nga kanunay gipagana ang kusog sa pag-inunongay taliwala sa kasakit ug kalipay. Wala pa’y hingpit nga makahulagway sa sukdanan o kinutuban niini.

Tungod kay daghan na kita og naobserbahan, sa reyalidad sa kinabuhi, ilabi na niadtong anaa pa sa lebel sa panag-uyab, ang salag sa gugma napuno sa matam-is nga panaad.

Nagdilaab nga ingon sa makapaso ang hilabihang kainit sa panumpa, apan nataligam-an ang epekto nga kun kini gipaigo lang diha sa dila, wala’y pamatuod sa pagbuhat niini, mapulihan sa kapait ang katam-is.

Mas maayo pa nga dili hulmahon sa pulong ang gugma kay molipang ra kini nga pasagdan ug maoy pasultihon ang buhat. Makapalig-on kini nga maugmad ang tiunay nga makalipay nga pagminahalay.

Wala kini mag-agad sa kondisyon, ang pagsinabtanay ug pag-inunongay sa kalisdanang mosungog sa kinabuhi. Dinhi makalaum kita og bentaha sa gugma nga nakaukit na nga molahutay nga makalipay.

Balaanon ang gugma, dili ni basta lang hukason aron pasipad-an,  ang pagbati o emosyon, gasa ni gikan sa Kahitas-an nga maoy tuburan sa gugma. Ang katuyoan niini, dili aron mamiserable nga mag-antos kita sa kasakit, kun dili, palambuon ang gipangindahay nato nga makalipay.

Wala na’y makatumbas sa kabililhon niini, bisan pa og ihaylo ang kasilak sa bulawan, dili igo luyahon ang gahum sa tim-os nga pagminahalay nga malipayon. Kini ang permi nato nga ihari sa atong kasingkasing, kay gumikan niini makaseguro kita nga dili kita mahitumpawak sa pagpakabuhi nga puno sa kaalautan. Atong ipahat sa uban nga makat-on sila niini, aron kitang tanan magmalipayon.