Kandila niugdaw sa 36 ka balay

CEBU, Philippines - Kandila nga nataligam-an maoy hinungdan sa sunog nga niigo sa sayong kadlawon sa Sitio Tagutongan sa Brgy. Suba ning Dakbayan sa Sugbo.Kini ang gikonpirmar ni Senior Fire Officer 1 Edwin Handayan, ang imbestigador sa Cebu City Fire Department nga nahinabi sa Banat News.

Matud pa ni Handayan, nadawat nila ang maong alarma alas 4:10 sa kaadlawon ug nakontrolar nila alas 5:10 na sa kabuntagon nga niabot ngadto sa second alarm.

Sumala pa ni Handayan, 36 ka panimalay ang hingpit nga naugdaw ug posible pa kini nga mosaka tungod sa sikit-sikit ang panimalay nga ginama sa light materials.

Dugang pa ni Handayan, gibana-bana nilang niabot P500 mil  ang danyos niini. Ilang ipatawag ang tag-iya sa panimalay nga diin nagsugod ang sunog nga gipanag-iya ni Edwin ug Jasmin Bacalso.

Si Jade Bacalso, usa sa mga nanag-iya sa balay nga nasunog nitug-an nga dul-an na sa usa ka bulan nang way kuryente ang kwarto sa iyang igsuon kay magsige man kini og spark.

Gitug-an ni Bacalso, ang pagduwa-duwa og kandila sa iyang pag-umangkon maoy iyang gituohan nga hinungdan sa sunog. Apan ang 10 anyos nga batang Bacalso nga iyang gitumbok  nitug-an sa Banat News nga nagdagkot siya og kandila kay nakamata siya nga ngitngit ilang kwarto ug siya ra usa. Matud niya iyang gibutang sa bangko nga plastic ang kandila apan nakatulog siya pagbalik.

Nakabantay na lang siya nga pwerteng inita sa lawak ug sa iyang pagmata nagkayo na ang bangko ug gisuwayan niya pagpawong pinaagi sa pagyatak-yatak niini apan napaso hinuon siya ug kay di na man niya mapawong ug pwerte nang dakoa sa kalayo midagan na lang siya sa gawas.

Gihimakak sa bata nga giduwaan niya ang kandila kay matud niya igo ra siya nagpasiga niini kay ngitngit.

Si Justin Baybay, usa ka 17 anyos nga trisikad driver maisogon nga nitabang sa usa ka inahan nga na-trap sa sunog.

Samtang nagsige siya og pagsablig og tubig nakadungog siya og singgit sa usa ka babaye gikan sa usa sa mga balay nga nagsugod na og silaob, ang ginang adunay gikugos nga bulan pa kapin niining anak.

Dali siyang nikuha og case sa softdrinks ug gikatkat  ug gikuha ang masuso ug ang inahan niini. Gitug-an ni Baybay, bisan sa iyang estado sa kinabuhi dako niyang kalipay nga nakatabang sa iyang isig ka tawo.

Si Kapitan Jojo Sable sa iyang bahin nitug-an nga mopahigayon sila og emergency session aron makadeklarar na og state of calamity aron magamit nila ang ilang pundo.

Plano karon sa dakbayan nga ipaubos sa reblocking ang nasunogan nga diin 66 ka balay ang naapektahan nga gipuy-an sa 42 ka pamilya base sa talaan sa DSWS ug Quick Response team.

Matud ni Nagiel Bañacia, pangu sa Cebu City Disaster Risk Reduction Management Office (CCDRRMO) ang mga nasunogan gipahiluna sa Suba Sports Complex ug gihatagan na sila og hinabang sa siyudad.

Dili hinuon angay mabalaka ang mga residente sanglit makabalik ra sila og tukod sa ilang mga balay kay ang luna usa ka Slum Improvement Resettlement (SIR) nga iya sa gobiyerno nga gi-award ngadto sa mga namuyo. (BANAT NEWS)