Bahin sa load nga mawagtang

Hangtod karon padayon nga gibaha ang akong cellphone kalabot sa mga reklamo mahitungod sa load sa ilang mga cellphone nga mangawagtang lang bisan wala nila gamita. Daghan gayod ang nagbugalbugal bahin niini. Kinsa man say dili magbagulbol nga dili god sayon mangitag kuwarta karong panahona. Ang load sa cellphone nahidugang pa sa budget sa matag indibidwal sa inadlaw nilang kalihokan.

Unya mawagtang lang sa dili ikapasabot nga hinungdan. Walay laing basolon sa mga subscriber kondili ang mga network provider tungod kay sila ra man gayod ang mapasanginlan nga maoy nagkuha sa mga load. Kinsa pa man diay lain? Ayaw kog ingna nga gikorap na sab sa mga politiko ang load sa mga cellphone? Dili na kana katuohan. Busa, dili kita makabasol sa mga subcriber nga mobasol sa duha ka dagkong kompaniya sa komunikasyon nga maoy nag-provide og network sa cellphone tungod kay wala man god usab nila ikapasabot ang hinungdan sa misteryosong pagkahanaw sa load sa ilang mga subscriber.

Sama niining ulahing text nga akong nadawat nga nagkanayon: "Good day. Samtang nagbasa ko sa imong column nga Modus sa Banat News gipadad-an na pod ko og ringtone sa 209. Pinangayo pa gyod to nako ang akong load bali og P30. Nahurot gyod intawon ang akong load sa way pulos. Daghan na kaayo ming biktima niini. Palihog tabangi mi kay mao pay pobre samotan pa gyod nila. Salamat. Rex of Bantayan Island, Smart Subscriber." -- 0918-3704359 (Oct. 9, 2005--10:18:08)

Mao lagi kana ang atong problema karon. Wala gyod kitay mahimo mahitungod niining problemaha. Ambot kon kinsa ang may katakos pagsumpo sa misteryosong pagkahanaw sa mga load. Maayo usab unya kon makapasabot ang mga network provider ngadto sa ilang mga subscriber bahin sa lintunganay niining maong problema o kakulian o aberiya ba kaha nga matawag. Pero nindot gyod unta kon dili na lang sila mopadalag hagad og ringtone, logo ug uban pa ngadto sa ilang subscriber kon wala kini mag-request apan dili sila kadudahan.

* * *

Sa laing bahin: "Sir Uriel, maayong adlaw. Mangayo unta ko nimo og tabang bahin sa South. Naa mi diri sa Ginatilan. Wa mi telepono nga makakontak sa CEBECO. Usa ako ka suki sa imong lindog." -- 0910-8358311

Wala ka man magbutang og specific sa imong text kon unsay imong problema nga buot nimong patabangan. Nganong buot ka man mokontak sa CEBECO? Kon wala ikaw ing telepono ug mahinungdanon ang imong tuyo, mas maayo tingali nga moduaw ka nalang sa labing duol nga buhatan sa CEBECO aron matubag ang imong problema o panginahanglan. Anyway, salamat sa imong text."

(Sumbong ug reklamo? Text sa 0910-8105522)