Labayanan sa Talisay wala gitanyag ni Eddiegul

CEBU, Philippines - Giklaro ni City of Talisay Mayor Eduardo Gullas nga wala siya motanyag sa labayanan og basura sa siyudad isip maoy labayanan sa mga basura gikan sa dakbayan sa Sugbo.  Iyang gipasabot nga bukas siya sa posibilidad sa maong katuyuan ilabi na og aduna na’y mga tawo nga mohangyo kaniya alang niini.

Sa pagkakaron matud ni Mayor Gullas nga wala pa’y nisuway og hangyo kaniya nga molabay og basura sa Barangay Tapul.

Dugang sa mayor nga kun aduna man gani, dili dayon siya mosanong niini kay iya pang konsultahon ang mga tawo nga eksperto bahin sa labayanan. Kini aron dili mabutang sa alanganin ang dakbayan sa Talisay sa umaabot nga mga panahon. Usa sa iyang gihuna-huna mao ang kadali ra unya nga mapuno sa landfill sa Tapul ug sila na sab hinuon ang magproblema kun asa molabay og basura.

Gawas pa niana, iya usab nga gihuna-huna ang karsada nga agian kanunay sa mga dagkung sakyanan nga kargahan sa mga basura. Nasayran nga ang konseho sa niaging administrasyon, nipasar og resolusyon nga dili palabayan og basura ang landfill sa Talisay gikan sa laing mga lugar. (BANAT NEWS)