Sayop ang entry sa gender sa Birth Certificate

Dear Atty. Divine,

Ang akong Birth Certificate kinahanglan og correction ang entry sa gender kay instead nga Female, ang nabutang Male. Dia na ako karon nagtrabaho sa Cebu apan didto ko sa Davao natawo ug didto ko narehistro.

Gusto unta ko nga mokuha og passport kay mo-apply ko og trabaho sa abroad, apan kining akong birth certificate maoy akong problema. Ang akong pangutana, unsay buhaton nako aron makurihean ang gender sa akong Birth Certificate sa mas dali nga paagi? Daghang salamat.— Genara

 Dear Genara,

 Mahimo nimo nga pakurihean ang imong gender sa Birth Certificate pinaagi sa pag-file og Petition ngadto sa Local Civil Registrar diin ka marehistro. Gawas sa imong Petition, kinahanglan nga i-attach nimo sa Petition ang imong mga school records, baptismal certificate ug uban pa nga dokumento nga magpakita sa imong tinuod nga gender.

Ilakip usab nimo sa pag-submit ang court clearance, NBI clearance ug police clearance as proof nga wa kay criminal records o pending nga criminal case.  Kinahanglan sab ikaw og medical certificate gikan sa usa ka government doctor as proof nga wa ka moagi og sex transplant ug kinahanglan sab og publication sa newspaper ang imong Petition.

Kun makompleto mo kining tanan, ang Civil Registrar na ang mohimo sa correction apan kinahanglan gyud nimo kini nga i-follow up kanunay aron kini mapadali. Aduna sab kini bayad nga P3,000 isip filing fee. Thanks and God bless! - Atty. Divine