Kusinero sa prisohan nakuhaan og shabu

CEBU, Philippines - Labihan ang pagmahay sa kusinero sa Cebu City Jail human kini gisikop sa mga jail guard kay nakuhaan kinig unom ka medium size sa gidudahang shabu dihang girekisa pagsulod sa maong pasilidad pasado alas 9 sa nakalabay nga gabii. Ang dinakpan nga mao si Roque Lauron, 33 anyos, lumad nga taga Brgy. Baliang sa Dakbayan sa Danao.               Si Lauron nga nahinabi sa Banat News miingon nga kapin sa duha ka tuig na siyang kusinero sa CCJ ug nagpuyo ra sab siya sa sulod. Giangkon niini nga tiggamitan siya og ginadiling drugas apan taud-taud na sab siyang wala mogamit.

Matud niini nga iyang nakuha ang shabu sa sulod sa selopin nga adunay pan nga iyang nakita daplin sa dalan sa may Brgy. Kalunasan dihang siya migawas aron pawngon ang suplay sa tubig sa pasilidad. Sa pagsulod niyag balik sa  CCJ, nakita sa searcher nga shabu ang sulod sa putos nga iyang gidala.

Apan si CCJ warden JSupt. Jessie Calumpang miingon nga nasakpan sa jail guard ang shabu nga adunay timbang nga 30 gramos nga gipa-ilawom sa kalo nga gisul-ob ni Lauron.

Sigon ni Calumpang nga sa dihang nakita sa mga searcher ang putos didto na mikurog si Lauron.

Nagduda si Calumpang nga lagmit adunay nagsugo ni Lauron nga kuhaon ang shabu aron dalhon sa sulod, apan dihang gipangutana kini wala kini mitug-an.

Kagahapon sa buntag laing putos sa gituohang shabu ang nakita sa ilawom sa lamesa sa gate sa CCJ. Apan wala mabantayi sa jail guards kun kinsa ang nagbutang niini. Nagtuo si Calumpang nga lagmit nahadlok ang nagdala niini ug gibutang na lang ilawom sa lamesa.

Sa pagkakaron, plano ni Calumpang nga mabutangan og bag-ong CCTV camera sa atubangang gate aron makita kun kinsa ang magbilin og drugas nga mga dalaw.

Mas pahugtan sab nila ang pagrekisa sa mga dalaw aron wala gyu’y makalusot nga drugas sa prisohan.

Nabantayan ni Calumpang human nasuspenso ang Oplan Tukhang, mas migara na sab ang mga nasakpan nila nga nagdala og drugas sa sulod. Diin usa sa mga diskarte sa mga dalaw karon aron makapalusot og shabu mao ang paagi sa pagsalisi sa mga guwardiya diin kun malipat ang jail guard sa gate adunay laing kauban nila nga maoy mokuha sa shabu ug ibutang sa laing sudlanan, ilabina kun daghang dalaw ang mosulod.

Sa Talisay City Jail nga nahimutang sa Brgy. Maghaway nasikop kagahapon sa buntag si April Tecson, 31 anyos taga Brgy. Lawaan III human makuhai og pinutos nga shabu.

Sumala ni jail warden JCIns. Josephus Jelianggao nga mobisita si Tecson sa iyang kapuyo nga si Richie Manguit nga adunay kasong may kalabutan gihapon sa ilegal nga drugas.

Nakuha nila gikan kang Tecson, ang tulo ka large packs, duha ka medium packs ug usa ka gamay nga putos. Lakip nilang nasakmit ang P78 mil nga cash ug mga gagmay nga plastic nga posibleng sudlan sa gibahig nga shabu.

Nasayran nga nabantayan ni JO1 Geraldine Calum nga adunay gipapilit sa batiis ni Tecson hinungdan nga kini gisita ug didto nakita ang dala niini nga drugas.

Dugang ni Jelianggao nga mohimo pa sila og mas lawom nga imbestigasyon batok kang Tecson. - DILT) (BANAT NEWS)