Misyon sa kasingkasing

Gula 63

“U-unsa?” Nakugang si Sandra.

“Katulog na,” matud ni Bradley nga sa pagsabot ni Sandra, daw dili na niini buot nga ilang tas-on ang paghisgot bahin kang Debra. “Ugma mosayo ta’g panggawas dinhi sa hotel.”

Mihilom nalang si Sandra. Nakita niya nga mihigda na si Bradley sa may sopa nga nahimutang habig sa tiilan sa kama nga iyang gihigdaan.

Ngitngit pa gani nanggawas na sila si Sandra ug Bradley sa hotel. Igong nahingpit na ang kahayag sa kabuntagon, diha na sila sa terminal sa mga bus nga mobiyahe paingon sa lungsod sa Alcoy.

Misakay gilayon sila sa bus nga lumargahay na sa ilang pag-abot. Nagtupad sila paglingkod sa bakanteng lingkoranan nga igo gayod alang sa duha ka pasahero.

Diha’y newsboy nga misaka sa bus. Mipalit si Bradley og usa ka hulad sa Banat News nga maoy kinaham niyang basahon matag buntag. Pero nakugang siya dihang nabasa niya ang banner headline: POLIS NANGIDNAP! Ang hingpit nga asoy sa balita atua sa ikaduhang panid.

Gidali pagpakli ni Bradley ang pamantalaan ngadto sa ikaduhang panid aron masayran ang detalye sa balita. Ug mao na lang ang iyang pagpanglumoy dihang iyang nasayran nga ang giingong polis nga nangidnap siya diay ang gipasabot. Si Col. Ver Rivera nga nahinabi sa taga media kagahapon mipasangil kaniya nga mi-kidnap kang Sandra Diolan. -- Sumpayan pa