Maestro nga kolongo

Alas siyete sa buntag. Nakahukom si Charlie, usa ka CPA, nga mosayo og adto sa iyang opisina kay duna siya’y papeles buhaton nga karong buntaga iyang gustong humnon. Kay gihangyo nga ipadali sa iyang kliyente. Gikan sa iyang grahean sa balay, hinay kaayo nga gipaatras niya iyang Crosswind nga asul.

Kay ang karsada atubangan sa iyang balay, agianan sa mga estudyante sa Tobras Central School, daghan pang nangagi nga mga traysikol ug habalhabal nga nanghatud og mga bata. Daghan sang nanaglakaw lang padulong sa gate sa eskuylahan.

Samtang nag-aginod nga nag-atras ang sakyanan, nipasiklap si Charlie sa motorsiklo dapit sa iyang wala. Nag-urong ang motorsiklo. Ug nagbarog ang drayber sa walang habig sa kilid sa motorsiklo. Nagsud-ong ang drayber sa motorsiklo, sa Crosswind nga nag-atras.

Sementado ang karsada nga nagkonek luyo sa barangay hall sa Tobras dapit sa silangan, ngadto sa gate sa eskuylahan dapit sa kasadpan. Gilubag ni Charlie ang manibela aron padulong sa kasadpan iyang pag-atras. Inig kahuman modimano siya padulong sa silangan. Duha ka kilometro ang gilay-on sa iyang opisina gikan sa barangay hall.

Dihang hapit na gayud muabot ang sampot sa Crosswind sa kinadaplinan, habagatang habig sa  karsada, kalit may nibusina.  Gamay ang busina nga susama sa Crosswind. Nipaurong si Charlie. Gi-handbrake niya ang sakyanan. Nanaug si Charlie. Gilili niya ang luyo sa sakyanan. Nagsiga ang mga mata sa drayber, magtutudlo sa nahisgutang tunghaan. Gi-parking niya sa daplin ang motorsiklo niya. Tungod gyud sa atrasanan sa Crosswind. Wa gyud siya niirog samtang nag-atras ang Crosswind.

“Naunsa man ka, sir? Puwerte gyud nakong pahinay sa pag-atras aron ang naa’s akong luyo nga di nako makita, moirog. Kay nag-backing gUd ko,” ni Charlie. “Abi man nako’g wa nag-andar imong sakyanan,” tubag ni Mr. Limpiad. Nakapanglingo si Charlie. Nakatawa ang drayber sa habalhabal sa duol. “Unsa may gamit sa sakyanang wa nag-andar nga nagbabag taliwala sa karsada?” nakatuaw sa hilom si Charlie. “Duna man gyud diay magtutudlo nga kolongo. Unsa kahay gama sa mga pupil ana?” (Kataposan)