Balay nga may sigbin

Ulitawo nga guwang si Pedyong ug sa iyang pangedaron nga hapit na magsaysinta anyos wala pa g’yuy nakapapitik sa iyang kasingkasing.

Wala pa niya ikahibalag ang babaye nga iyang nagustohan nga himuong kapikas sa iyang kinabuhi. Nahibulong ang mga igsuon ni Pedyong kay silang tanan may tagsatagsa na ka pamilya.

“Pedyong, dili ka na g’yud tingali maminyo pa kay tiguwang ka na, ug kun maminyo ka man, gamay pa ang imong anak ikaw magsangkuong na, busa, ayaw na lang g’yud paghunahuna og minyo,” matud ni Rasona nga tindera’g bingka.

Anak si Rasona nila ni Bartolo-Guada, ang gidungog nga mga ungo sa ilang balangay apan maoy labing sapian kay daghan kaayo’g kabtangan, sama sa kayutaan nga may tanom nga lubi ug mga lagutmon.

“Duna ko’y naibgan, Ras. Ug bisa’g manghod nako’g lima ka tuig kanang bayhana, mahalon g’yud nako kun kami ang magkadayon apan dili tawon ko magpabilin nga ulitawo nga guwang,” hinay’ng tubag ni Pedyong.

Ug mipahiyom si Rasona. Unya, lain ang gisumpay ni Rasona, “Pedyong, sayod ko nga dako ug daghan ka na’g tinigom, ikaw na lay palit sa among balay.”

“Imong ibaligya? Sayang kaayo,” ni Pedyong pa.

“Mobalhin man gud ko’g puyo kay ako na lang usa sa balay. Wala na man sila si tatay ug nanay. Kuyawan ko, kanang magabii,” pahayag ni Rasona.

Gipalit na lang ni Pedyong ang karaang balay nila ni Rasona. Naa kini mahimutang sa may sabakan sa usa ka bungtod. Nindot kaayo kini nga lantawon gikan sa ubos.

Ug kay iya na man ni Pedyong ang balay, gipanghipos ni Rasona ang iyang mga butang ug may gisulti siya kang Pedyong nga misulod sa kuwarto sa dalaga.

“Pedyong, may underground baya kining among balay ug tua didto ang akong mga binuhi,” ni Rasona. “Binuhi? Unsa may imong mga binuhi, Ras?” ni Pedyong nga nagpakisayod.

“Kadiyot lang, ha, kay akong tawgon.” Gitawag ni Rasona ang iyang mga binuhi ug nanuol sila dayon. Misinta ang galamhan ni Pedyong ug nangurog siya sa kahadlok pagkakita sa mga sigbin!

“Ayaw kahadlok Peds kay dili kana sila manghilabot basta buotan ka ug ako lang ni nga ibilin nimo. Peds,” ni Rasona pa. Tuod, matag gabii may makakita kang Pedyong nga maglakaw kuyog sa mga sigbin. (Kataposan)