Goodbye Maricel

Gula 1

Maanyag kaayo si Maricel. Kini gani ang hinungdan nga sa una pa lang nga pagkakita ni Albino kaniya, ang kasing-kasing sa ulitawo daw naglumpayat ug gibati dayon og dili tiaw nga kaibog kang Maricel.

May kawili nga ingon sa mipugong ni Albino aron dili talikdan si Maricel, apan hugot na ang iyang hukom nga biyaan si Maricel nga luhaan ang mga mata. Nagsingabot niadto ang pasko ug tingali mao kadto ang mapait nga pinaskohan ni Maricel.

Nahandum ni Albino ang sulagma kaayo nila nga panagkita ni Maricel. Diha’ng misulod si Albino sa usa ka fast food restaurant sa downtown area, wala pa’y bakante nga lingkoranan ug nagsapwang na siya sa tray nga gisudlan sa gi-order niya nga mga pagkaon.

“Puwede ba mo-share sa table?” iyang giingnan ang maanyag nga nag-inusara nga naglingkod atubangan sa usa ka lamesa. Mipahiyom ang maanyag nga nagpasabot nga wala siya’y pagsupak nga mag-atbang sila pagkaon ug si Albino.

“Ako si Al… Albino g’yud ang akong ngalan. Daghan kaayo’ng kustomer uy, tingpaniudto man gud,” matud ni Albino dungan sa pagtunol sa tuo niya’ng kamot sa maanyag. “Just call me Maricel,” tubag sa maanyag.

Mibatyag og gamay’ng kauwaw si Albino kay alang kaniya katahaan gayud si Maricel. May pagka buwagaw ang buhok niini ug porma kaayo ang mga lips ug lamurok ang mga aping nga giduyogan sa tag-as niini nga mga pilok.

“Can I offer you a cup of ice cream or any something sweet?” giingnan ni Albino ang maanyag. Mipahiyom kini ug mitutok kang Albino. “Thanks, Ice cream na lang ang ako Al,” ni Maricel.

Mitindog si Albino ug miadto sa front desk aron pag-order og ice cream. Nahinangop siya kay mikubit sa iyang offer si Maricel. (Sumpayan)