EDITORYAL - Kalibog sa kasaysayan

Nitingog na ang Korte Suprema bahin sa pagpalubong sa kanhi diktador nga si Ferdinand Marcos. Naningog usab ang mga supak niini kay dako kuno nga insulto sa demokrasya sa nasud kay matud pa dili bayani si Marcos, dili sama sa ubang gilubong sa Libingan ng mga Bayani.

Ang mga Marcos dugay na nga nangandoy nga malubong ang ilang patriarka diha sa Libingan ng mga Bayani kay matud pa mao kini ang iyang kataposang hangyo sa wala pa mamatay. Sa mata sa iyang pamilya ug mga ka-probinsya sa Ilocos, ingon man sa iyang mga die-hard supporters, bayani kanila si Marcos.

Gusto sa uban nga tak-opan na kini nga yugto sa kasaysayan sa Pilipinas, apan sa mga biktima sa Martial Law dili kini mahimo hangtod nga mangayo og pasaylo ang mga Marcos.

Daghan gani nga kabataan nga wala pa matawo kaniadto  dihang gipatuman ang Martial Law, niapil na karon sa mga lihok protesta ug panawagan base lang sa ilang nabasahan ug nahibaw-an sa binuhatan sa mga Marcos nga gipasa kanila pinaagi sa mga eskuylahan ug sa ilang katiguwangan.

Tinuod, angay na nga kalimtan ang maong yugto, apan dili maayo nga kalimtan usab ang leksyon nga gitudlo sa maong kasaysayan nga gipakigbisogan sa mga Filipino aron mabalik ang demokrasya sa nasud pinaagi sa pagpalubong sa tawo nga nakaingon sa kasakit sa nasud.

Dili ikapanghimakak nga daghan og maayong binuhatan si Marcos alang sa Pilipinas, apan sa iya usab nga panahon naghitak ang kurapsyon, pag-abuso ug paglapas sa tawhanong katungod sa mga tawo nga gustong magpabilin ang kagawasan ug demokrasya sa mga Filipino.

Dakong sayop ang pagtuo nga kun malubong si Marcos diha sa Libingan ng mga Bayani makalimtan na ang tanan kay makadugang hinoon kini sa kasuko sa katawhan nga hangtod karon wala mahatagi og hustisya bisan sa paglabay na sa 40 ka tuig. Makapalibog lang hinoon kini sa umaabot nga henerasyon.